İsrailin "El Al" aviaşirkəti İlon Maska məxsus Starlink şirkəti ilə müqavilə bağladığını elan edib. Bu tərəfdaşlıq çərçivəsində "El Al" təyyarələrində yüksəksürətli internetə çıxış təmin ediləcək. Reuters-in 15 iyun tarixli məlumatına görə, müqavilənin maliyyə detalları açıqlanmır.
Planlara əsasən, İsrail hava daşıyıcısının təyyarələrinə Starlink avadanlığının quraşdırılması 2027-ci ildə başlayacaq. Yüksəksürətli internetə çıxış xidməti sərnişinlər üçün pulsuz olacaq.
Uçuş zamanı sürətli Wi-Fi-ın mövcudluğu son illərdə aviaşirkətlər üçün premium müştəriləri cəlb etmək uğrunda mübarizədə əhəmiyyətli rəqabət üstünlüyü olub.
SpaceX şirkətinin bir hissəsi olan Starlink, aşağı orbitdəki peyklər şəbəkəsi vasitəsilə internetə çıxış təmin edir. Ookla şirkətinin məlumatına görə, bu texnologiya ənənəvi peyk sistemlərinin imkanlarını bir neçə dəfə üstələyən əlaqə sürətini təmin edir.
Starlink-in tətbiqi sərnişinlərimizə uçuş zamanı əlaqədə qalmağa, axın xidmətlərindən istifadə etməyə, habelə fasiləsiz işləməyə və ünsiyyət qurmağa imkan verəcək.
Bu barədə "El Al"ın baş direktoru Levi Halevi bildirib.
"El Al"ın uzunmənzilli təyyarə parkı əsasən müasir Boeing 787 Dreamliner laynerlərindən ibarətdir və şirkət onu daha da genişləndirməyi planlaşdırır. Bundan əlavə, daşıyıcı Avropa marşrutları üçün nəzərdə tutulmuş Boeing 737 MAX təyyarələri sifariş edib.