Oktyabrın 29-dan noyabrın 1-dək Bakıda keçiriləcək “Azerbaijan Dance Festival 2026″ beynəlxalq rəqs festivalının proqramı açıqlanıb.
Təşkilatçıların verdiyi məlumata görə, festivalda dünyanın 20-dən çox ölkəsindən nümayəndələr iştirak edəcək. Tədbirə qatılacaq iştirakçıların ümumi sayının 1000 nəfəri keçəcəyi gözlənilir.
Bu il festival “Dəyişiklik küləyi, ideyalar işığı, arzu alovu… Hər bir rəqqasın görüş yeri!” şüarı ilə keçiriləcək. Proqram çərçivəsində yarışlar, maarifləndirici tədbirlər və mədəni mübadilə layihələri təşkil olunacaq. İştirakçılar Avropa və Latın Amerikası rəqsləri, Smooth, Rhythm, salsa, baçata və Argentina tanqosu üzrə yarışlarda mübarizə aparacaqlar.
Proqram
Festival oktyabrın 29 və 30-da keçiriləcək Beynəlxalq Rəqs Konqresi ilə başlayacaq. Konqres çərçivəsində ustad dərsləri təşkil olunacaq, xarici mütəxəssislərlə peşəkar təcrübə mübadiləsi aparılacaq.
Festivalın rəsmi açılış mərasimi oktyabrın 30-da keçiriləcək. Həmin gün beşilliyini qeyd edən Night of the Dancing Diamonds qala-şousu çərçivəsində teatrlaşdırılmış proqram nümayiş olunacaq. Çıxışları Boris Myaqkovun orkestri müşayiət edəcək, gün isə Salsa Party ilə başa çatacaq.
Oktyabrın 31-də WADF dünya çempionatları, Open to the World turnirləri və SRDS Super Trophy seriyası üzrə yarışlar keçiriləcək. Festival iştirakçıları üçün Azərbaycanın mədəni irsini tanıdan interaktiv ekskursiya da təşkil olunacaq. Gün dünya rəqs ulduzlarının iştirakı ilə baş tutacaq final mərhələsi ilə yekunlaşacaq.
Festival noyabrın 1-də World Cup Pro-Am Dance Series beynəlxalq seriyasının mərhələsi və My Azerbaijan adlı rəsmi vida gecəsi ilə başa çatacaq.
Təşkilatçıların bildirdiyinə görə, festivalın bütün tədbirlərinə biletlər artıq satışdadır.
Festival haqqında
Festival “Smooth & Rhythm Dance Style” (SRDS) təşkilatının rəhbəri Olqa Krasnyanskaya və “Azerbaijan Dance Council” (AzDC) təşkilatının rəhbəri Təranə Muradovanın təşkilatçılığı ilə keçirilir. Layihənin həmtəsisçiləri rəqs üzrə altıqat dünya çempionları Eldar Cəfərov və Anna Sajinadır.
“Azerbaijan Dance Festival 2026” UNESCO tərəfindən rəsmi olaraq tanınan 7″ Dance Wonders of the World” təşəbbüsünün flaqman layihəsidir. Festivalın əsas məqsədi beynəlxalq peşəkar əməkdaşlığın genişləndirilməsi və Azərbaycanın dünya rəqs mərkəzlərindən biri kimi tanıdılmasıdır.
Mənbə: news.day.az