ABŞ-ın Miçiqan ştatından olan senator Ceremi Moss 11-ci seçki dairəsi üzrə Nümayəndələr Palatasına namizədlik uğrunda Demokratlar Partiyasının praymerizində qalib gəlib.
C. Moss bundan əvvəl bu dairəni təmsil edən və ABŞ Senatına namizədliyini irəli sürən Heyli Stivensin yerinə Demokratlar Partiyasının namizədi olacaq.
İlkin nəticələrə əsasən, bülletenlərin 97 faizi sayıldıqdan sonra Ceremi Moss səslərin 49,5 faizini toplayıb. Onun əsas rəqibi, vəkil Aişə Faruki isə 31,8 faiz səs qazanıb.
Qələbəsindən sonra Moss “X” sosial şəbəkəsində paylaşım edərək seçicilərinə təşəkkür edib.
“Təşəkkür edirəm, Okland dairəsi! Demokratlar Partiyasından namizədiniz olmaq bütün həyatımın ən böyük şərəfidir”, – deyə o yazıb.
Miçiqan ştatının 11-ci seçki dairəsi Detroyt şəhərinin ətrafında yerləşən Okland dairəsini əhatə edir. Bu bölgədə yəhudi icmasının sayı yüksəkdir. Dairənin ərazisində yerləşən Uest-Blumfild şəhərindəki sinaqoq bu ilin əvvəlində baş vermiş hücum nəticəsində ciddi zərər görmüşdü.
Ceremi Moss siyasi fəaliyyəti boyunca dəfələrlə antisemitizmə qarşı çıxış edib. O, seçki kampaniyasında İsraillə bağlı siyasəti əsas mövzuya çevirməsə də, Yaxın Şərq münaqişəsinin iki dövlət prinsipi əsasında həllini dəstəklədiyini dəfələrlə bəyan edib.
Seçki kampaniyası zamanı rəqibləri C. Mossu İsraili dəstəkləyən AIPAC təşkilatı ilə əlaqələndirməyə çalışıblar. Siyasətçi isə “Jewish Insider” nəşrinə müsahibəsində bu ittihamların bəzi hallarda antisemitizmin təzahürü kimi qiymətləndirilə biləcəyini bildirib.
Mənbə: jta.org