Bakıda fəaliyyət göstərən 211 nömrəli marşrut avtobusunda sürücü ilə sərnişin arasında mübahisə baş verib.
Sosial şəbəkələrdə yayılan görüntülərdən məlum olur ki, azyaşlı övladı və onun kiçik skuteri ilə avtobusa minmək istəyən qadına sürücü skuter və velosipedlə avtobusa daxil olmağın qadağan edildiyini bildirib.
Bundan sonra tərəflər arasında gərginlik yaranıb. Qadın övladının autizmli olduğunu, bu səbəbdən piyada hərəkət etməsinin çətinlik yaratdığını deyərək sürücüdən istisna edilməsini xahiş edib.
Lakin görüntülərə əsasən, sürücü qadın və övladının avtobusdan enməsini tələb edib. Nəticədə sərnişin avtobusu tərk etmək məcburiyyətində qalıb.
Hadisənin görüntüləri sosial şəbəkələrdə geniş müzakirələrə səbəb olub. Məsələ ilə bağlı aidiyyəti qurumların mövqeyi hələlik açıqlanmayıb.