ABŞ Ədliyyə Nazirliyi FBR tərəfindən qarşısı alınan Ağ Evə hücum cəhdində iştirak edən beş nəfərə qarşı ittiham elan edib. Hücum 14 iyun tarixində, ABŞ prezidenti Donald Trampın 80 illik yubileyi zamanı baş verməli idi.
Saxlanılanlar arasında 19 yaşlı Taysen Proprın adı çəkilib. O, 10 iyun tarixində Ohayo ştatında həbs edilib. Anası hüquq-mühafizə orqanlarına onun ekstremist qruplaşma ilə internet əlaqələri və aktiv silah alması barədə məlumat verib.
Ədliyyə Nazirliyinin açıqlamasına görə, Taysenin üstündən odlu silahlar, minlərlə patron, həmçinin Konqresin çoxsaylı üzvləri də daxil olmaqla potensial hədəflər haqqında məlumat aşkar edilib. Aşkar edilən yazışmalar onun radikal dini inanclarını və aqressiv hökumət əleyhinə mövqeyini sübut edir.
Digər həbs olunanlar 24 yaşlı Omar Rou, 32 yaşlı Maykl Allan Tomas, 32 yaşlı Daniel Ekstridj və 31 yaşlı Ebrakham Ermostilio Alvaresdir. Onlara sui-qəsd ittihamı irəli sürülüb. Həbslər Ohayo, Kaliforniya, Missuri və Nebraska ştatlarının ərazisində həyata keçirilib.
İstintaq materialları göstərir ki, şübhəlilər Trampın doğum günündə Ağ Evin qarşısındakı çəmənlikdə təşkil edilən UFC Freedom 250 döyüşləri zamanı partlayıcı maddə ilə dolu dronları işə salmağı planlaşdırırdılar. Məqsəd panika yaratmaq idi ki, snayperlər mühüm hədəflərə atəş açsınlar.