Rusiya və Ukrayna həlak olmuş hərbçilərin cəsədlərinin növbəti mübadiləsini Belarus ərazisində həyata keçiriblər.
Məlumata görə, mübadilə Belarusun Qomel vilayətində yerləşən “Novaya Quta” sərhəd-keçid məntəqəsində baş tutub. Tərəflər arasında mübadilə 501-ə 31 formatında reallaşdırılıb.
Belə ki, Rusiya Ukraynaya 501 həlak olmuş ukraynalı hərbçinin cəsədini təhvil verib. Öz növbəsində Ukrayna Rusiyaya 31 rus hərbçisinin cəsədini qaytarıb.
Belarus rəsmiləri bildiriblər ki, ölkə Rusiya və Ukrayna arasında humanitar missiyasını davam etdirir. Qeyd olunub ki, rəsmi Minsk hərbi əsirlərin, mülki şəxslərin və həlak olmuş hərbçilərin cəsədlərinin mübadiləsinin təhlükəsiz və təşkil olunmuş şəkildə həyata keçirilməsi üçün zəruri şərait yaradır.
Bu, Belarusun vasitəçiliyi ilə təşkil edilən həlak olmuş hərbçilərin cəsədlərinin mübadiləsi üzrə növbəti humanitar əməliyyat hesab olunur.