İsrail hökuməti İudeya və Samariyada (Qərb Sahili) yeni yaşayış məntəqələrinə aparan yol infrastrukturunun genişləndirilməsi məqsədilə 1,075 milyard şekel (təxminən 320 milyon ABŞ dolları) həcmində maliyyə vəsaiti ayırıb.
Qərara əsasən, üç il ərzində həyata keçiriləcək proqram çərçivəsində yeni giriş və təhlükəsizlik yolları inşa ediləcək, mövcud avtomobil yolları yenidən qurulacaq, həmçinin yaşayış məntəqələrini bir-biri ilə birləşdirən yeni yol hissələri çəkiləcək.
Ayrılan vəsaitin əsas hissəsi Samariyanın şimalında yerləşən yeni layihələrə yönəldiləcək. Buraya Xomeş, Sa-Nur, Qanim və Kadim yaşayış məntəqələrinə aparan yolların layihələndirilməsi və tikintisi daxildir.
İsrail hökumətinin bildirdiyinə görə, proqramın məqsədi bölgədə nəqliyyat əlçatanlığını yaxşılaşdırmaq, təhlükəsizlik infrastrukturunu gücləndirmək və mövcud yaşayış məntəqələrinin inkişafını dəstəkləməkdir.
Qeyd edək ki, Samariyada yaşayış məntəqələrinin genişləndirilməsi ilə bağlı qərarlar beynəlxalq müstəvidə mütəmadi müzakirələrə səbəb olur. İsrail isə bu layihələri təhlükəsizlik və regional inkişaf baxımından zəruri hesab etdiyini bildirir.