İsrail Xarici İşlər Nazirliyi Venesuelanın şimalında baş vermiş dağıdıcı zəlzələlərdən İsrail vətəndaşlarının zərər çəkib-çəkmədiyi ilə bağlı hələlik dəqiq məlumatın olmadığını açıqlayıb.
Yerli KİV-lərin məlumatına görə, təbii fəlakətlər qurbanlarının axtarışı ilə məşğul olan ZAKA təşkilatı Venesuelaya göndərilməsi üçün xüsusi qruplarını hazırlayır.
Qeyd edək ki, Venesuelanın şimalında qısa zaman ərzində ardıcıl iki güclü zəlzələ baş verib. Ölkənin paytaxtı Karakasda çoxsaylı binaların dağıldığı bildirilir. Hazırda ölən və yaralananların dəqiq sayı məlum olmasa da, söhbətin minlərlə insandan getdiyi qeyd olunur.
ABŞ Geoloji Xidmətinin (USGS) məlumatına görə, ilk zəlzələ ABŞ-ın şərq sahili vaxtı ilə saat 18:00 radələrində 7,2 bal gücündə qeydə alınıb. Bir dəqiqədən sonra eyni bölgədə 7,5 bal gücündə ikinci zəlzələ baş verib.
Hər iki zəlzələnin episentri Karakasdan təxminən 160 kilometr qərbdə, Karib dənizi sahilində yerləşən Moron şəhəri yaxınlığında olub. Episentrlər bir-birindən təxminən 5 kilometr məsafədə yerləşib.
Venesuela prezidenti vəzifəsini icra edən Delsi Rodriges ölkədə fövqəladə vəziyyət elan edib və bir neçə ştatın zərər gördüyünü bildirib. O, vətəndaşları sakitliyə və həmrəyliyə çağırıb.
Bu zəlzələlər 1900-cü ildən bəri Venesuelada qeydə alınan ən güclü yeraltı təkan olub. Həmin il ölkədə 7,7 bal gücündə zəlzələ baş vermişdi.
Venesueladakı zəlzələlərdən təxminən yarım saat sonra Yaponiyanın şərq sahillərində 6,9 bal gücündə zəlzələ qeydə alınıb. Bundan əvvəl isə ABŞ-ın Şimali Kaliforniya ştatında 5,6 bal gücündə yeraltı təkan baş verib.