İsrail Müdafiə Ordusu (SAXAL) Livanda BMT-nin sülhməramlı missiyasının (UNIFIL) postundan təxminən 300 metr aralıda yerləşən “Hizbullah” qruplaşmasının yeraltı komandanlıq mərkəzinin məhv edildiyini açıqlayıb.
SAXAL-ın məlumatına görə, Livanın cənubundakı bufer zonasında yerləşən Haddata kəndində keçirilən əməliyyatlar zamanı təxminən 55 metr uzunluğunda yeraltı tunel aşkar edilib. Qurğu üç otaqdan ibarət olub və yaraqlılar tərəfindən komandanlıq məntəqəsi kimi istifadə edilib.
Hərbçilər həmçinin tunellə birləşən və içərisində çoxlu sayda silah olan yeraltı şaxta da aşkar ediblər.
Ordunun mühəndis bölmələri aşkar edilmiş infrastruktur obyektini uğurla ləğv ediblər.
Mənbə: report.az
