Azərbaycan Ukraynaya ümumi çəkisi təxminən 40 ton olan humanitar yardım partiyası göndərib. Yük ölkənin enerji və nəqliyyat infrastrukturunu dəstəkləmək üçün nəzərdə tutulmuş elektrotexnika avadanlıqlarından ibarətdir. Bu barədə Ukraynanın Energetika Nazirliyi “X” sosial şəbəkəsində məlumat yayıb.
Ukrayna qurumunun məlumatına görə, avadanlıq ixtisaslaşdırılmış enerji habı vasitəsilə dəmir yolunun regional bölmələrindən birinə çatdırılıb. Bu yardım ukraynalı dəmiryolçuların işinə dəstək verməyə və kritik əhəmiyyətli obyektlərin fəaliyyətini təmin etməyə yönəlib.
Demək olar ki, hər gün hab vasitəsilə Ukraynanın müxtəlif regionlarına yeni avadanlıq göndərilir. O, daimi Rusiya hücumları təhlükəsi şəraitində həm enerji sektorunun, həm də digər kritik infrastruktur obyektlərinin fasiləsiz işini təmin etməyə kömək edir.
Ukraynanın Energetika Nazirliyində göstərilən dəstəyə və ölkənin infrastrukturunun gücləndirilməsindəki yardıma görə Azərbaycana minnətdarlıq bildiriblər.
