İsrailin Baş naziri Benyamin Netanyahu ABŞ Prezidenti Donald Trampla keçirdiyi görüşü iki lider arasında indiyədək baş tutan ən uğurlu danışıqlardan biri kimi qiymətləndirib.
B. Netanyahu bildirib ki, görüş qarşılıqlı anlaşma və strateji tərəfdaşlıq ruhunda keçib. Onun sözlərinə görə, tərəflər İranın nüvə silahına sahib olmasının qarşısının alınmasının ortaq məqsəd olduğunu bir daha təsdiqləyiblər.
Baş nazir qeyd edib ki, danışıqlar zamanı İsrailin təhlükəsizliyi və gələcəyi üçün mühüm əhəmiyyət daşıyan məsələlər üzrə gələcək addımların əlaqələndirilməsi müzakirə olunub.
İsrailin “Kanal 12” televiziyasının məlumatına görə, təxminən 1 saat 20 dəqiqə davam edən görüş tamamilə İran məsələsinə həsr olunub. Kanalın mənbələrindən biri hazırkı vəziyyəti “kritik mərhələ” kimi dəyərləndirərək bildirib ki, ABŞ prezidenti İrana münasibətdə atılacaq növbəti addımlarla bağlı qərar verməyə yaxındır.
