Dövlət İmtahan Mərkəzi (DİM) ali təhsil müəssisələrinin magistratura səviyyəsinə qəbul üçün ixtisaslaşma seçiminin vaxtını 27 iyul saat 13:00-dək uzadıb. Müsabiqə şərtlərini ödəyən və ixtisaslaşma seçimində iştirak etmək hüququ qazanan bakalavrlar həmin vaxta qədər internet vasitəsilə öz seçimlərini təsdiqləməlidirlər.
DİM-in 27 iyul saat 09:15-ə olan məlumatına əsasən, artıq 15633 bakalavr ərizəsini təsdiqləyib. Onlardan 14251 nəfəri Azərbaycan bölməsi, 1382 nəfəri isə rus bölməsi üzrə qeydiyyatdan keçib.
İxtisaslaşma seçimi müddətində namizədlər bitirdikləri bakalavr ixtisasına və istəklərinə uyğun olan 20-dək ixtisaslaşmanın kodunu seçə bilərlər. Həmin kodlar “Bakalavrın elektron ixtisaslaşma seçimi ərizəsi”nə istənilən ardıcıllıqla daxil edilib təsdiqlənməlidir. Seçilən ixtisaslaşmalar (bəzi ixtisaslaşmalar üçün həmçinin xarici dilə qoyulan tələb) namizədin bitirdiyi ixtisasa müvafiq olmalıdır.
Qəbul aparılan ixtisaslaşmaların və onlara ayrılan yerlərin siyahısı “Magistr” jurnalının 4-cü nömrəsində təqdim olunub. Qeyd olunur ki, yalnız elektron ərizəsində ixtisaslaşmaları seçmiş və təsdiq etmiş bakalavrlar müsabiqəyə buraxılacaqlar.
