Bu il 17-19 iyul tarixlərində İsrail Vokal Ansamblı 2025–2026-cı il mövsümünün yekun konsert proqramını təqdim edəcək. Konsertlərdə dünya klassik musiqisinin şah əsərlərindən biri olan Cüzeppe Verdinin “Rekviyem”i səsləndiriləcək.
Bu dəfə əsər alman dirijoru Mixael Betsner-Brandtın hazırladığı kamera versiyasında ifa olunacaq. Proqram Raanana, Hayfa və Təl-Əviv şəhərlərində keçiriləcək, eyni zamanda onlayn yayımlanacaq. Konsertlərə dirijor Yuval Ben-Ozer rəhbərlik edəcək.
Kamera versiyasının əsas xüsusiyyəti böyük simfonik orkestr əvəzinə cəmi beş musiqiçinin – fortepiano, marimba, valtorna, kontrabas və zərb alətləri ifaçılarının çıxış etməsidir. Xor və solistlərin partiyaları isə orijinal formada saxlanılıb. Bu yanaşma dinləyicilərə xorun və solistlərin ifasını daha yaxından və emosional şəkildə hiss etmək imkanı yaradır.
Cüzeppe Verdi “Rekviyem” əsərini əvvəlcə bəstəkar Coakino Rossininin, daha sonra isə italyan yazıçısı Alessandro Mandoninin xatirəsinə həsr edib. Əsərin premyerası 22 may 1874-cü ildə Milanda keçirilib və böyük uğur qazanıb. Bu gün Verdinin “Rekviyem”i klassik musiqi irsinin ən möhtəşəm nümunələrindən biri hesab olunur.
Mütəxəssislərin fikrincə, Mixael Betsner-Brandtın hazırladığı kamera versiyası məşhur əsərə yeni bədii baxış təqdim etməklə yanaşı, onun emosional təsir gücünü daha fərqli şəkildə ön plana çıxarır.
