Beynəlxalq KİV-lərin məlumatına görə, hücumlar nəticəsində azı 58 hökumət hərbçisi həlak olub, onlarla insan yaralanıb. Hadisə 2022-ci ildə əldə olunmuş atəşkəsdən bəri Yəməndə baş verən ən qanlı hücumlardan biri hesab olunur.
Eyni vaxtda husilər Səudiyyə Ərəbistanının Yəmənlə sərhəddə yerləşən Nəcran bölgəsini də atəşə tutublar. Səudiyyə rəsmilərinin açıqlamasına əsasən, hücum nəticəsində 11 mülki şəxs, o cümlədən azyaşlı uşaq yaralanıb. Yaralananlar arasında Səudiyyə Ərəbistanı, Yəmən, Misir və Pakistan vətəndaşlarının olduğu bildirilir.
Səudiyyə Ərəbistanı hücumları beynəlxalq humanitar hüququn kobud şəkildə pozulması kimi qiymətləndirərək husiləri mülki əhalini qəsdən hədəfə almaqda ittiham edib. Riyad bölgədə təhlükəsizliyin təmin edilməsi üçün zəruri tədbirlərin görüləcəyini açıqlayıb.