Qahirə, 11 İyul – Misirin şimalındakı Delta bölgəsində yerləşən Qarbiyə vilayətində sərnişin qatarının vaqonu relsdən çıxaraq aşıb.
Misir Milli Dəmir Yolları İdarəsindən verilən rəsmi məlumata görə, hadisə yerli vaxtla səhər saat təxminən 07:50 radələrində qeydə alınıb. Dəmənhur-Qallin-Tanta marşrutu üzrə hərəkət edən 450 saylı sərnişin qatarı Tanta şəhəri yaxınlığındakı “Məhəllə Ruh” (Mahalla Rouh) stansiyasına daxil olarkən vaqonlardan birinin təkəri relsdən çıxıb.
Hadisə yerinə çoxlu sayda təcili tibbi yardım maşınları, qəza-bərpa xidmətləri, xüsusi kranlar və texniki briqadalar cəlb olunub.
Qarbiyə vilayətinin qubernatoru Əla Əbdül Moati bildirib ki, qəza nəticəsində 16 sərnişin yaralanıb.
“Yaralıların hamısının xəsarətləri yüngül dərəcəlidir (əsasən sıyrıqlar, əziklər və yüngül travmalar) və hazırda onların həyatı üçün heç bir təhlükə yoxdur”.
Misir Milli Dəmir Yolları İdarəsi qəzanın başvermə səbəblərini araşdırmaq üçün xüsusi texniki komissiyanın yaradıldığını elan edib. Komissiyanın rəyindən sonra hadisədə məsuliyyəti olan şəxslər barəsində lazımi hüquqi tədbirlərin görüləcəyi bildirilir.