İsrailin Təhsil Nazirliyi ilk dəfə olaraq dövlət məktəblərində tefillin taxılması ilə bağlı vahid milli siyasəti müəyyən edən təlimatı dərc edib.
Yeni qaydalara əsasən, dövlət məktəblərinin direktorları tefillin taxmaq istəyən şagirdlərə təhsil müəssisəsinin ərazisində bunun üçün şərait yaratmalıdır.
Təlimat peşəkar mütəxəssislərin iştirakı ilə hazırlanıb və son illərdə məktəb direktorlarının fərqli yanaşmaları səbəbindən şagirdlər və valideynlərlə yaranan anlaşılmazlıqları və gərginliyi aradan qaldırmağı hədəfləyir.
Sənədə əsasən, hər bir məktəb bu məsələyə dair daxili prosedur hazırlamalı və onu rəsmi qaydalara daxil etməlidir. Prosedurda tefillin taxılması üçün xüsusi yer ayrılmalı və bunun həyata keçiriləcəyi dəqiq vaxt müəyyən edilməlidir. Təlimatda vurğulanır ki, tefillin yalnız dərs fasilələri zamanı taxıla bilər və bu proses dərs saatlarına mane olmamalıdır.
Bundan əlavə, təlimatda qeyd olunur ki, tefillinin məktəbə gətirilməsi, eləcə də şagirdlərin dərslərə vaxtında qatılması və dərs cədvəlinə əməl etməsi tam şəkildə bu ibadəti yerinə yetirmək istəyən şagirdlərin məsuliyyətidir.
Təhsil Nazirliyi məktəb direktorlarına yeni siyasətin tətbiqindən əvvəl müəllim heyəti, valideyn komitələri və şagird şuraları ilə müzakirələr aparmağı tövsiyə edir. Məqsəd mümkün münaqişələrin qarşısını almaq və məktəblərdə mövcud təhsil mühitini qorumaqdır.
Təhsil naziri Yoav Kiş yeni qaydaların dərc olunması münasibətilə bildirib:
“Yəhudi dövlətində tefillin taxılması mübahisə və ya yerli yozum mövzusu olmamalıdır. Uzun illər bu sahədə vahid tənzimləmənin olmaması şagirdlər, valideynlər və məktəb rəhbərliyi üçün gərginlik və qeyri-müəyyənlik yaradırdı. Hazırki təlimat bu sahədə qayda yaradır, məktəb rəhbərlərinə aydın çərçivə təqdim edir və tefillin taxmaq istəyən hər bir şagirdin bunu hörmət, nizam-intizam və təbii şəkildə həyata keçirməsinə zəmanət verir”.