Honduras, 14 iyul – İsraildən Hondurasa ezam olunan oftalmoloqlardan ibarət tibbi missiya 136 nəfər üzərində uğurlu göz əməliyyatı həyata keçirib.
Məlumata görə, israilli həkimlər ümumilikdə 155 xəstəni müayinə edib, onlardan 136-sına müxtəlif göz xəstəlikləri ilə əlaqədar cərrahi müdaxilə olunub. Humanitar missiya Honduras prezidenti tərəfindən edilən müraciətdən sonra təşkil edilib.
Bildirilir ki, Hondurasda göz xəstəliklərinin yayılması yüksək olsa da, ixtisaslaşmış oftalmoloqların sayı kifayət qədər deyil. Bu səbəbdən İsrail ölkəyə təcrübəli göz həkimlərindən ibarət xüsusi tibbi qrup göndərib.
Missiya çərçivəsində israilli mütəxəssislər yalnız xəstələri müalicə etməklə kifayətlənməyib, həm də yerli həkimlərlə təcrübələrini bölüşərək, onların peşəkar biliklərinin artırılmasına dəstək veriblər.
İsrailin “Şeba” xəstəxanasının oftalmoloqu Emanuel Şvalb bildirib ki, Honduraslı həmkarları ilə qısa müddətdə səmərəli əməkdaşlıq qurmaq mümkün olub və birgə iş uğurla davam etdirilib.
İsrail tərəfi Hondurasa dəstəyin davam edəcəyini də açıqlayıb. Yaxın vaxtlarda ölkəyə yeni oftalmoloji avadanlıqların göndərilməsi və növbəti həkim qrupunun ezam olunması planlaşdırılır.
Qeyd edək ki, son dövrlərdə İsrail və Honduras arasında əməkdaşlıq müxtəlif sahələrdə, o cümlədən səhiyyə istiqamətində daha da genişlənir. Honduras hökuməti İsraillə əlaqələrin inkişaf etdirilməsinə xüsusi önəm verdiyini bildirib.