HƏMAS-ın Qəzza zolağında 505 gün girov saxladığı və 2025-ci ilin fevralında azadlığa qovuşan israilli Eliya Koen qarşıdan gələn toyu ərəfəsində nişanlısı Ziv Abud ilə birlikdə xına mərasimi keçirib.
Ailə üzvləri və yaxın dostlarının iştirak etdiyi mərasimdə Koen üzərində “Təşəkkür edirəm, Ata” sözləri həkk olunmuş ənənəvi geyim geyinib. O bildirib ki, bu ifadə əsirlikdə keçirdiyi 505 gün ərzində ona güc verib və azad edildikdən sonra da həyatının ayrılmaz hissəsinə çevrilib.
Koenin sözlərinə görə, geyim dizaynerlər Kineret Hena və Cina Larusa tərəfindən hazırlanıb. Müharibə dövründə onların hazırladığı bəy geyimlərində “Onları evə qaytarın” şüarı yer alırdı. Bu dəfə isə həmin şüar Koenin şəxsi həyat devizi olan “Təşəkkür edirəm, Ata” ifadəsi ilə əvəz edilib.
Eliya Koen 7 oktyabr 2023-cü ildə HƏMAS silahlılarının “Nova” musiqi festivalına hücumu zamanı girov götürülmüşdü. O, 505 gün davam edən əsirlikdən sonra 2025-ci ilin fevralında İsrailə qayıtmışdı.
Koen əsirlikdə olarkən sevgilisi Ziv Abudun hücum zamanı həlak olduğunu düşünürdü. Lakin azad edildikdən sonra onun sağ qaldığını və bütün bu müddət ərzində onun azad olunması üçün mübarizə apardığını öyrənmişdi.