Ermənistanın müxalif “Çiçəklənən Ermənistan” Partiyasının sədri, iş adamı Qagik Tsarukyanın evində hüquq-mühafizə orqanları tərəfindən axtarış aparılır.
Partiyanın mətbuat katibi İveta Tonoyanın məlumatına görə, təhlükəsizlik qüvvələri Tsarukyanın yaşadığı ərazini mühasirəyə alıb və evdə istintaq hərəkətləri həyata keçirilir. Hazırda axtarışın hansı cinayət işi çərçivəsində aparıldığı barədə rəsmi məlumat açıqlanmayıb.
Erməni KİV-lərinin yaydığı məlumata əsasən, əməliyyatlar təkcə Tsarukyanın iqamətgahı ilə məhdudlaşmır. Hüquq-mühafizə orqanları onun nəzarətində olan bir sıra obyektlərdə, o cümlədən Ermənistan Milli Olimpiya Komitəsinin bazasında, eləcə də “Ararat” Konyak-Şərab-Araq Zavodu və “Multi Wellness” idman kompleksində də axtarışlar aparır.
Hadisə Ermənistanın daxili siyasi gündəmində növbəti səs-küylü əməliyyat kimi qiymətləndirilir. Son aylarda hakimiyyətlə müxalifət arasında münasibətlərin gərginləşdiyi bir vaxtda keçirilən bu əməliyyat siyasi dairələrdə geniş müzakirələrə səbəb olub. Bununla belə, Ermənistanın İstintaq Komitəsi və digər rəsmi qurumlar hələlik axtarışların səbəbi ilə bağlı ətraflı açıqlama verməyiblər.