London, 13 İyul – Böyük Britaniya hökuməti ölkədə yəhudi icmalarının təhlükəsizliyinin gücləndirilməsi məqsədilə növbəti üç il ərzində 250 milyon funt sterlinq vəsait ayıracağını açıqlayıb.
Qərar son dövrlərdə ölkədə antisemitizm halları və yəhudilərə qarşı nifrət zəminində baş verən hücumların artması fonunda qəbul edilib.
Hökumətin planına əsasən, ayrılan vəsait hesabına 500-dən çox əlavə polis əməkdaşı xidmətə cəlb olunacaq. Onlar yəhudilərin sıx yaşadığı ərazilərdə patrul xidməti aparacaq, məktəblərin, sinaqoqların və icma mərkəzlərinin təhlükəsizliyini təmin edəcəklər.
Əlavə polis qüvvələrinin əsas hissəsi London və Mançesterdə fəaliyyət göstərəcək. Bununla yanaşı, ölkənin digər bölgələrində də təhlükəsizlik tədbirlərinin gücləndirilməsi üçün əlavə maliyyə ayrılacaq.
Maliyyənin bir hissəsi terrorla mübarizə bölmələrinin imkanlarının genişləndirilməsinə, həmçinin polis tərəfindən həyata keçirilən təhlükəsizlik proqramlarının davam etdirilməsinə yönəldiləcək. Bildirilir ki, həmin proqramlar şübhəli fəaliyyətlərin vaxtında aşkar edilməsinə və mümkün terror aktlarının qarşısının alınmasına kömək edir.
Böyük Britaniyanın Baş naziri Kir Starmer bildirib ki, antisemitizmlə mübarizə hökumətin əsas prioritetlərindən biridir.