Braziliyada saatda 100 kilometrdən çox sürətlə əsən küləklə müşayiət olunan güclü fırtına ölkənin bir sıra bölgələrində ciddi fəsadlar törədib. Yerli KİV-in məlumatına görə, təbii fəlakət nəticəsində azı 5 nəfər həlak olub, infrastruktur isə ciddi zərər görüb.
Fırtına səbəbindən ölkənin müxtəlif bölgələrində genişmiqyaslı elektrik enerjisi kəsintiləri yaşanıb. Xüsusilə San-Paulu və Rio-de-Janeyro ştatlarında ictimai nəqliyyatın hərəkəti pozulub, hava limanlarında reyslər gecikib, dəniz nəqliyyatının fəaliyyəti isə məhdudlaşdırılıb.
Əlverişsiz hava şəraiti Latın Amerikasının ən böyük limanı hesab olunan Santus limanının fəaliyyətinə də təsir edib. Güclü külək və yüksək dalğalar səbəbindən limanın işi müvəqqəti dayandırılıb, dəniz sərnişin daşımaları isə təhlükəsizlik məqsədilə tamamilə dayandırılıb.
Vəziyyətin ciddiliyini nəzərə alan San-Paulu ştatı hökuməti böhran vəziyyətlərinin idarə olunması üzrə operativ qərargah yaradıb. Sinoptiklərin proqnozlarına görə, fırtına cümə axşamınadək davam edəcək. Güclü yağış, ildırım, göy gurultusu və dolu gözlənilir ki, bu da sel və daşqın riskini daha da artırır.
Səlahiyyətli qurumlar sakinlərə zərurət olmadığı halda evlərini tərk etməməyi və rəsmi xəbərdarlıqlara əməl etməyi tövsiyə edirlər.
Mənbə: jnews.az
