Fövqəladə Hallar Nazirliyinin (FHN) “112” qaynar telefon xəttinə Bakı şəhərinin Suraxanı rayonu, Hövsan qəsəbəsində, ən yaxın sularda xilasetmə məntəqəsindən 1 kilometr aralıda yerləşən dənizin nəzarətsiz hissəsində dörd nəfərin batması barədə ilkin məlumat daxil olub.
FHN-in yaydığı məlumata görə, məlumat daxil olduqdan dərhal sonra Nazirliyin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri hadisə yerinə cəlb edilərək axtarış-xilasetmə əməliyyatına başlayıblar.
Dalğıc-xilasedicilərin həyata keçirdiyi operativ xilasetmə tədbirləri nəticəsində 1985-ci il təvəllüdlü Aysel Bəkir qızı Əliyeva, 2009-cu il təvəllüdlü Elmira Rauf qızı Rüstəmova və 2019-cu il təvəllüdlü Nuray Rauf qızı Rüstəmova sağ-salamat xilas ediliblər.
Axtarışlar zamanı isə 2013-cü il təvəllüdlü Aylin Rauf qızı Rüstəmovanın meyiti sudan çıxarılaraq aidiyyəti üzrə təhvil verilib.
Fövqəladə Hallar Nazirliyi vətəndaşlara müraciət edərək təhlükəsizlik qaydalarına ciddi riayət etməyə çağırıb. Qurum xüsusilə nəzarət olunmayan, qeyri-çimərlik ərazilərdə çimməməyi və küləkli hava şəraitində dənizə girməməyi tövsiyə edib.
Mənbə: oxu.az
