İsraildə qondarma “erməni soyqırımı”nın tanınması ilə bağlı irəli sürülən təşəbbüsün irəliləməsi dayandırılıb. Məlumata görə, bu prosesdə Azərbaycanın diplomatik səyləri həlledici rol oynayıb.
İddiaya görə, iyun ayında İsrail Xarici İşlər Nazirliyi qondarma “erməni soyqırımı”nın tanınması məsələsinin müzakirəsinə başlayıb. Təşəbbüs İsrail-Türkiyə münasibətlərində davam edən gərginlik fonunda gündəmə gəlsə də, Bakıda ciddi narahatlıq doğurub.
Bildirilir ki, Azərbaycan tərəfi təşəbbüs barədə əvvəlcədən məlumatlandırılmayıb. Bakıda hesab edilib ki, qərarın hazırlanması zamanı Azərbaycanın mövqeyi, Azərbaycan-Türkiyə strateji müttəfiqliyi və Azərbaycan-İsrail tərəfdaşlığı üçün həssas məqamlar kifayət qədər nəzərə alınmayıb.
Məlumata əsasən, iyunun 29-da Azərbaycan Xarici İşlər Nazirliyi rəsmi mövqeyini İsrail tərəfinə çatdıraraq təşəbbüsə yenidən baxmağa çağırıb. Diplomatik kanallarla Təl-Əvivə bildirilib ki, belə bir addım həm İsrail-Türkiyə münasibətlərinə, həm də Azərbaycan-İsrail strateji əməkdaşlığına mənfi təsir göstərə bilər.
Qeyd olunur ki, Azərbaycanın arqumentləri İsrailin müxtəlif siyasi dairələrində də dəstək qazanıb. Müxtəlif siyasi düşərgələri, ekspert icmasını və dövlət qurumlarını təmsil edən şəxslər təşəbbüsün yenidən nəzərdən keçirilməsinin tərəfdarı olublar.
Nəticədə, iddiaya görə, qondarma “erməni soyqırımı”nın tanınması ilə bağlı proses faktiki olaraq dondurulub və məsələ İsrail hökuməti ilə parlamentinin gündəliyində irəliləməyib.