Yenilənib: Avqust 30, 2026 1:31 axşam
Venesuela ilə ABŞ arasında neft sektorunda 25 il müddətinə hesablanmış genişmiqyaslı enerji sazişi əldə olunub. Razılaşma çərçivəsində ölkənin neft hasilatının artırılması və uzun illərdir zəifləyən enerji sektorunun bərpası nəzərdə tutulur.
Jnews.az xəbər verir ki, Venesuelanın müvəqqəti prezidenti Delsi Rodrigesin açıqlamasına görə, 25 illik ikitərəfli layihə 17 strateji neft yatağının işlənməsini nəzərdə tutur. İlkin hədəf gündəlik neft hasilatını 1,5 milyon bareldən çoxa çatdırmaqdır.
Daha 8 neft bloku işlənə bilər
Rodriges bildirib ki, 1,5 milyon barellik hasilat hədəfi yalnız ABŞ-la ikitərəfli saziş çərçivəsində nəzərdə tutulan ilkin göstəricidir.
Daha geniş plan çərçivəsində əlavə 8 yeni neft blokunun da işlənməsi nəzərdə tutulur. Venesuela hökuməti bununla ölkənin enerji sektorunu genişləndirməyi və neft hasilatını əhəmiyyətli dərəcədə artırmağı planlaşdırır.
Venesuela neft üzərində suverenliyini saxlayacağını bildirir
Delsi Rodriges sazişin ölkənin təbii sərvətləri üzərində mülkiyyət və suverenliyini qoruduğunu bildirib.
Onun sözlərinə görə, razılaşma çərçivəsində ABŞ kapitalı, texnologiyası və əməliyyat imkanlarından istifadə etməklə Venesuelanın uzun müddətdir böhran yaşayan neft sənayesinin bərpasına dəstək veriləcək.
ABŞ Prezidenti Donald Tramp isə saziş çərçivəsində Vaşinqtonun Venesuelanın 65 milyard bareldən çox təsdiqlənmiş neft ehtiyatlarına əhəmiyyətli çıxış əldə edəcəyini açıqlayıb. Associated Press-in məlumatına görə, yeni yaradılacaq şirkətdə ABŞ-ın hasilat üzrə effektiv payının 55 faiz olması nəzərdə tutulur.
Venesuela gəlirlərini artırmağı gözləyir
Delsi Rodrigesin sözlərinə görə, neftin bir barelinin 65 dollar qiymətindən hesablanması halında saziş Venesuelaya təxminən 209 milyard dollar gəlir gətirə bilər.
O bildirib ki, hasil edilərək satılan hər bareldən təxminən 19 dollar birbaşa Venesuela dövlətinin gəlirlərinə yönələcək.
Venesuela hökuməti sazişi ölkə iqtisadiyyatının bərpası və enerji sektorunun yenidən qurulması baxımından tarixi addım kimi qiymətləndirir. Bununla yanaşı, layihənin tam həyata keçirilməsi üçün ölkənin köhnəlmiş neft infrastrukturuna böyük həcmdə investisiya qoyulması tələb olunur.
Mənbə: jnwes.az
