İsraildə 2001-ci il avqustun 9-da Yerusəlimdəki “Sbarro” pizza restoranında törədilən terror aktının 25-ci ildönümü qeyd olunur. HƏMAS-ın həyata keçirdiyi hücum nəticəsində 7-si uşaq və biri hamilə qadın olmaqla 16 mülki şəxs öldürülüb, 130-a yaxın insan yaralanıb.
İsrail Xarici İşlər Nazirliyi ildönümü ilə bağlı açıqlamasında hücumun bir ailəni demək olar ki, tamamilə məhv etdiyini bildirib. Nazirlik qeyd edib ki, 25 il keçməsinə baxmayaraq, hücumun təşkilatçıları və icraçıları terroru təbliğ etməyə və İsrail vətəndaşlarına qarşı hücumları dəstəkləməyə davam edirlər.
ABŞ-ın İsraildəki səfiri Mayk Hakabi də faciənin ildönümü ilə bağlı bəyanat yayıb. O, hücum zamanı həlak olan ABŞ vətəndaşlarının adlarını çəkib. Bunlar 5 aylıq hamilə olan 31 yaşlı Cudit Qrinbaum, ABŞ-İsrail vətəndaşlığı daşıyan 15 yaşlı Malka Rot və Xana Nahenberqdir.
31 yaşlı Xana Nahenberq hücum zamanı aldığı xəsarətlər nəticəsində təxminən 22 il komada qaldıqdan sonra 2023-cü ildə vəfat edib.
Malka Rotun atası Arnold Rot isə qızının ölümündə məsul şəxslərin ədalət qarşısına çıxarılması istiqamətində göstərdikləri səylərdə ABŞ hökumətindən kifayət qədər dəstək görmədiklərini bildirib.
Hücumun təşkilatçılarından biri kimi tanınan Əhlam Təmimi hazırda İordaniyada yaşayır. ABŞ 2013-cü ildə onun barəsində ittiham irəli sürüb və Təmimi Federal Təhqiqat Bürosunun (FTB) axtarış siyahısına daxil edilib. Buna baxmayaraq, İordaniya onun ABŞ-a ekstradisiyasından imtina edib.
Mənbə: jns.org
