Türkiyənin Rusiyadan aldığı S-400 hava hücumundan müdafiə sistemlərinin üçüncü bir ölkəyə satıldığı iddia olunur. Məlumata görə, satış prosesi yekunlaşıb və bununla bağlı rəsmi açıqlamanın bu gün verilməsi gözlənilir.
Türkiyənin “Hürriyət” qəzetinin yaydığı məlumata əsasən, S-400 zenit-raket kompleksləri Fars körfəzi regionundakı ölkələrdən birinə satılıb. Bildirilir ki, son 24 saat ərzində razılaşmanın yekun detalları üzərində iş aparılıb və gecə saatlarında bütün texniki maneələr aradan qaldırılıb.
Mənbənin iddiasına görə, sistemlərin alıcısı kimi Birləşmiş Ərəb Əmirlikləri və Qətər göstərilir. Lakin hansı ölkənin S-400-ləri aldığı hələlik rəsmi şəkildə təsdiqlənməyib.
Müəllif qeyd edir ki, Körfəz ölkələrinin alternativ hava hücumundan müdafiə sistemlərinə marağı son illərdə regionda yaşanan təhlükəsizlik böhranlarından sonra artıb.
İddialara görə, Türkiyə bu satış sayəsində təkcə ABŞ-ın sanksiyalarından qaynaqlanan təzyiqləri azaltmağa çalışmır, həm də sövdələşmədən maliyyə gəliri əldə etməyi planlaşdırır.
Qeyd edək ki, Ankara 2019-cu ildə Rusiyadan S-400 sistemlərini aldıqdan sonra ABŞ tərəfindən sanksiyalara məruz qalmış və F-35 qırıcı təyyarə proqramından çıxarılmışdı.