Azərbaycan Dəmir Yolları (ADY) iyulun 10-dan etibarən Bakı–Tbilisi–Bakı beynəlxalq marşrutu üzrə hərəkət edən qatarların tərkibinə əlavə 3 yataq tipli vaqon qoşacaq.
ADY-nin məlumatına görə, bununla da hər reys üzrə 104 əlavə sərnişin yeri yaradılacaq. Nəticədə bir reys üzrə ümumi sərnişin tutumu hazırkı 178 yerdən 282 yerə çatdırılacaq ki, bu da təxminən 60 faiz artım deməkdir.
Bildirilib ki, əlavə vaqonlara biletlərin satışı artıq başlayıb. Yeni vaqonlarda gediş haqqı hazırda istifadə olunan “Stadler” vaqonları ilə müqayisədə daha münasib olacaq.
Məlumata əsasən, Bakı–Tbilisi–Bakı marşrutu üzrə standart+ sinifdə gediş haqqı məsafədən asılı olaraq 40,30 manatdan başlayır.
Bir istiqamət üzrə minimum bilet qiymətləri isə belədir:
- Bakı – Tbilisi: 65,20 manat
- Yevlax – Tbilisi: 53,30 manat
- Gəncə – Tbilisi: 49,30 manat
- Ağstafa – Tbilisi: 45,30 manat
- Böyük Kəsik – Tbilisi vağzalı: 43,40 manat
- Böyük Kəsik – Qardabani stansiyası: 40,30 manat.
ADY qeyd edir ki, əlavə vaqonların istismara verilməsi beynəlxalq marşrut üzrə artan sərnişin tələbatının qarşılanmasına və daha çox sərnişinin rahat səfər etməsinə imkan yaradacaq.