Kubanın milli elektrik şəbəkəsində baş verən qəza nəticəsində ölkə üzrə genişmiqyaslı elektrik kəsintisi yaşanıb. Hadisə səbəbindən adanın təxminən 10 milyon sakini elektrik enerjisiz qalıb.
“Reuters” agentliyinin məlumatına görə, ölkənin enerji sisteminin operatoru olan UNE bildirib ki, ümummilli kəsintinin səbəblərinin müəyyənləşdirilməsi istiqamətində araşdırma aparılır.
Rəsmi məlumatlara görə, qəza baş verməzdən əvvəl də Kubanın ərazisinin təxminən üçdə ikisində elektrik təchizatında fasilələr müşahidə olunurdu.
Kuba son aylarda köhnəlmiş enerji infrastrukturu və yanacaq çatışmazlığı səbəbindən davamlı elektrik kəsintiləri ilə üzləşir. Davam edən iqtisadi çətinliklər fonunda baş verən son qəza ölkədəki vəziyyəti daha da ağırlaşdırıb və əhalinin gündəlik həyatına ciddi təsir göstərib.