İsrailin milli aviadaşıyıcısı “El Al” Asiya istiqamətində uçuş cədvəlinin əhəmiyyətli dərəcədə genişləndirildiyini elan edib. “Kursor” nəşrinin məlumatına görə, şirkət yüksək tələbatı ödəmək üçün 2026-cı ilin sentyabr və oktyabr aylarında Təl-Əviv və Tokio arasında əlavə birbaşa reyslər açıb.
Ben-Qurion hava limanından Yaponiyanın paytaxtına əlavə uçuşlar sentyabrın 28-i və 30-u, həmçinin oktyabrın 5, 12, 13, 17, 19, 21, 24-ü və 26-dan 28-dək olan dövrdə nəzərdə tutulub. Tokionun Narita hava limanından Təl-Əvivə geri dönüş reysləri isə oktyabrın 6–7, 13, 20, 22 və 27–29-u tarixlərinə planlaşdırılıb.
Yeni tarixlər üçün biletlər artıq aviaşirkətin rəsmi saytında satışa çıxarılıb. Bir tərəfə uçuşun qiyməti 868 ABŞ dollardan başlayır.
Avropa istiqamətlərinə xüsusi tariflər
Bununla yanaşı, “El Al” sərnişinlərə bayramlardan sonrakı dövrdə məşhur turist marşrutlarına endirimli qiymətlərlə biletlər təklif edib. Aksiyanın şamil olunduğu istiqamətlər siyahısına Kipr, Yunanıstan və Rumıniya daxil edilib.
Oktyabr və ya noyabr aylarında İsraildən Kiprə gediş-gəliş uçuşu 129 dollardan başa gələcək. Ayrı-ayrı bron edildikdə bir tərəfə biletin qiyməti 57 dollardan, geri dönüş isə 72 dollardan başlayır. Noyabr ayında Buxarestə (Rumıniya) birbaşa reyslər hər iki tərəfə 180 dollardan, Yunanıstanın Rodos adasına uçuş isə 184 dollardan təklif olunur.
Göstərilən qiymətə şəxsi əşyanın və əl yükünün daşınması daxildir. Aviadaşıyıcı xəbərdarlıq edir ki, tariflər dinamikdir və bronetmə prosesində tələbatdan və mövcud yerlərin sayından asılı olaraq dəyişə bilər.
Mənbə: Jnews.az