Pakistanın cənub-qərbində yerləşən Bəlucistan əyalətində baş verən ağır yol qəzası nəticəsində azı 40 nəfər həlak olub, daha 8 nəfər yaralanıb.
Hadisə iyulun 3-də səhər saatlarında Bəlucistan və Xayber-Paxtunxva əyalətlərinin sərhədi yaxınlığındakı Dana Sar ərazisində qeydə alınıb. Məlumata görə, Kvettadan İslamabada doğru hərəkət edən sərnişin avtobusu sürücünün idarəetməni itirməsi nəticəsində yoldan çıxaraq dərəyə aşıb. Avtobusda ümumilikdə 48 nəfərin olduğu bildirilir.
Qəza yerinə xilasedicilər, polis və təcili tibbi yardım briqadaları cəlb olunub. Yaralılar yaxınlıqdakı tibb müəssisələrinə çatdırılıb. Rəsmilər dağlıq relyefin xilasetmə əməliyyatlarını çətinləşdirdiyini bildiriblər.
Pakistanın Baş naziri Şahbaz Şərif həlak olanların ailələrinə başsağlığı verib və aidiyyəti qurumlara yaralılara lazımi tibbi yardımın göstərilməsi barədə tapşırıq verib.
