Kollektiv Təhlükəsizlik Müqaviləsi Təşkilatı (KTMT) Ermənistanın təşkilata daxil olduğu dövrdə mövcud olan sərhədlərini hələ də tanımayıb.
Bu barədə Ermənistanın hakim “Mülki Müqavilə” fraksiyasının deputatı Artur Hovhannisyan brifinq zamanı bildirib.
Deputat KTMT-nin Ermənistanın səsvermə hüququndan məhrum edilməsi və sonradan təşkilatdan çıxarılması ehtimalı ilə bağlı açıqlamaları şərh edərkən deyib ki, KTMT hələ də Ermənistan qarşısında götürdüyü öhdəlikləri niyə yerinə yetirmədiyini izah etməyib.
Hovhannisyan Ermənistanın təhlükəsizliyinin təmin edilməsi istiqamətində müstəqil addımlar atdığını vurğulayıb. Onun sözlərinə görə, İrəvan müxtəlif ölkələrlə strateji tərəfdaşlıq haqqında sazişlər bağlayır, hərbi sənayesini inkişaf etdirir və müdafiə potensialını gücləndirməyə çalışır.
“Ermənistan öz hərbi sənayesini və öz qüvvələrini inkişaf etdirmək, müxtəlif ölkələrlə strateji tərəfdaşlıq haqqında sazişlər bağlamaqla təhlükəsizliyini təmin etmək və bununla da hərbi və müdafiə potensialını inkişaf etdirmək üçün mümkün olan hər şeyi edir”, – deyə deputat bildirib.
Qeyd edək ki, Ermənistanın KTMT ilə münasibətləri son illərdə ciddi şəkildə gərginləşib. İrəvan təşkilatı ölkənin təhlükəsizliyi ilə bağlı öhdəliklərini yerinə yetirməməkdə ittiham edib və KTMT-nin fəaliyyətində iştirakını faktiki olaraq dondurub.
