Rusiya Federal Təhlükəsizlik Xidməti (FTX) Moskvadakı sinaqoqlardan birinə planlaşdırılan terror aktının qarşısını aldığını bəyan edib. Qurumun İctimaiyyətlə Əlaqələr Mərkəzinin məlumatına görə, hücumu hazırlayan şəxs əməliyyat-axtarış tədbirləri nəticəsində saxlanılıb.
Saxlanılan şəxsin Mərkəzi Asiya ölkələrindən birinin vətəndaşı olduğu müəyyən edilib. İstintaq materiallarına əsasən, o, Rusiyada fəaliyyəti qadağan olunmuş beynəlxalq terror təşkilatının göstərişi ilə hərəkət edib.
Məlumata görə, şübhəli şəxs terror aktını törətmək üçün hazırlıq işləri görüb. O, sinaqoqun yerləşdiyi ərazidə kəşfiyyat aparıb və əldəqayırma partlayıcı qurğu hazırlamaq üçün lazımi komponentləri satın alıb.
FTX əməkdaşları şübhəlini partlayıcı maddələrin gizlədildiyi anbardan götürərkən cinayət başında yaxalayıb. Gizli saxlanma yerindən istifadəyə tam hazır vəziyyətdə olan partlayıcı qurğu aşkar edilərək götürülüb.
Onun planına görə, partlayış sinaqoqda dindarların kütləvi şəkildə toplaşdığı zaman törədilməli idi. Terror aktından sonra isə həmin şəxsin Suriyada terrorçuların düşərgəsi olan bölgəyə yollanmağı planlaşdırdığı bildirilir.
Faktla bağlı “terror aktına hazırlıq” maddəsi ilə cinayət işi açılıb. Hazırda istintaq tədbirləri davam etdirilir.
