Milli Hidrometeorologiya Xidməti iyunun 20-si gündüzdən 22-dək ölkə ərazisində küləkli hava şəraitinin hökm sürəcəyini elan edib. Bu barədə xidmətdən verilən məlumatda Bakıda və Abşeron yarımadasında, eləcə də bir sıra bölgələrdə sarı və narıncı səviyyəli külək xəbərdarlığı edildiyi qeyd olunur.
Sarı xəbərdarlıq Naxçıvan Muxtar Respublikası, Bərdə, Tərtər, Yevlax, Ağdam, Ağcabədi, Beyləqan, Quba, Qusar, Xaçmaz, Şabran, Siyəzən, Xızı, Neftçala, Salyan, Saatlı, Sabirabad, İmişli, Lənkəran, Masallı, Astara, Lerik, Yardımlı, Cəlilabad, Biləsuvar, Kəlbəcər, Laçın, Füzuli, Cəbrayıl, Zəngilan, Qazax, Ağstafa, Tovuz, Şəmkir, Gədəbəy, Göygöl, Hacıqabul və Samux rayonları üçün verilib. Bu ərazilərdə şərq küləyinin sürəti saniyədə 13.9 metrdən 20.7 metrə qədər çatacaq.
Narıncı xəbərdarlıq isə daha güclü külək gözləntisi ilə bağlıdır və Bakı, Abşeron yarımadası, Mingəçevir, Gəncə, Naftalan, Goranboy, Daşkəsən kimi əraziləri əhatə edir. Bu bölgələrdə şimal-qərb küləyinin sürəti 20.8 m/san-dən 28.4 m/san-ə qədər güclənəcək.