Venesuelada baş vermiş güclü zəlzələdən sonra bu ölkəyə göndərilən İsrailin humanitar yardım missiyası fəaliyyətini başa vuraraq vətənə qayıdıb. Bununla belə, İsrail Venesuelanın bərpa prosesinə məsafədən peşəkar dəstək göstərməyə davam edəcəyini açıqlayıb.
Sözügedən missiya İsrailin Baş naziri Benyamin Netanyahu və xarici işlər naziri Gideon Saarın qərarı ilə, Venesuela hökumətinin müraciəti əsasında göndərilmişdi. Həmçinin, yerli hakimiyyətin xahişi ilə nümayəndə heyətinin ölkədə qalma müddəti də uzadılmışdı.
İsrail Xarici İşlər Nazirliyi, İsrail Müdafiə Qüvvələri (SAXAL) və Fövqəladə Hallar üzrə Milli İdarənin 50-dən çox əməkdaşından ibarət heyət zəlzələdən zərər çəkmiş ərazilərdə axtarış-xilasetmə, qiymətləndirmə və bərpa işlərinə dəstək göstərib.
Missiyanın başa çatması münasibətilə keçirilən görüşdə Venesuelanın müvəqqəti prezidenti Delsi Rodriges İsrail nümayəndə heyətinə göstərilən humanitar yardıma görə təşəkkür edib. Görüş zamanı görülən işlərin nəticələri və ölkənin bərpası ilə bağlı növbəti mərhələlər müzakirə olunub.
İsrail tərəfi bildirib ki, humanitar missiya başa çatsa da, israilli mütəxəssislər Venesuelanın aidiyyəti qurumları ilə əməkdaşlığı davam etdirəcək və bərpa prosesinə məsafədən ekspert dəstəyi göstərəcəklər.
Missiyaya İsrailin Venesueladakı səfiri Yoav Magen və Arxa Cəbhə Komandanlığının qərargah rəisi, briqada generalı Elad Edri rəhbərlik edib. Əməliyyatın son mərhələsində isə missiyaya ehtiyatda olan briqada generalı Yossi Pinto və səfir Gil Artsieli rəhbərlik ediblər.