Rusiya Hərbi Dəniz Qüvvələrinin (HDQ) tərkibinə “Murmansk” adlı yeni atom sualtı qayığı daxil edilib. “Yasen” layihəsinin doqquzuncu, modernləşdirilmiş “Yasen-M” seriyasının beşinci gəmisi olan “Murmansk” hərbi ekspertlər tərəfindən dünyanın ən böyük və müasir sualtı qayıqlarından biri kimi qiymətləndirilir.
Texniki göstəricilərinə görə, su tutumu 13 800 ton, uzunluğu isə 127 metr olan bu sualtı qayıq su altında saatda 70 kilometrədək sürətlə hərəkət etmək qabiliyyətinə malikdir. Gəmi gizliliyi artırmaq üçün nəzərdə tutulmuş xüsusi qabaqcıl texnologiyalarla təchiz olunub.
Sualtı qayığın silahlanması “Kalibr” və “Oniks” qanadlı raketləri, eləcə də müxtəlif növ torpedolarla təmsil olunur. Ekspertlərin fikrincə, gələcəkdə bu gəminin “Sirkon” hipersəs raketləri ilə də silahlandırılması istisna edilmir.
Hərbi icmalçılar “Murmansk”ın istifadəyə verilməsinin dənizdəki qüvvələr balansına ciddi təsir göstərə biləcəyini vurğulayırlar. Bununla belə, qeyd olunur ki, bu tip sualtı qayıqların real döyüş imkanları tam açıqlanmadığından, onların hərbi gücü barədə qiymətləndirmələr hələlik təxminlərə əsaslanır.