İsrail Maliyyə Nazirliyi və Müdafiə Nazirliyi ordu ehtiyaclarının maliyyələşdirilməsi istiqamətində mühüm razılığa gəliblər. Milli Təhlükəsizlik Şurasının vasitəçiliyi ilə baş tutan danışıqlar nəticəsində dövlət büdcəsindən hərbi ehtiyaclar üçün əlavə 5 milyard dollar (15 milyard şekel) vəsaitin ayrılması qərara alınıb.
Məlumata görə, bu qərar Müdafiə Nazirliyinin hərbi xərclər səbəbindən yaranan maliyyə kəsirini qarşılamaq üçün tələb etdiyi 40 milyard şekel vəsait fonunda qəbul edilib.
Maliyyə Nazirliyinin rəsmi açıqlamasında qeyd olunub ki, bu kompromis addım bir sıra müsbət nəticələr verəcək:
• 2026-cı il üçün təsdiqlənmiş dövlət büdcəsinə yenidən baxılmasına ehtiyac qalmayacaq.
• Yeni vergilərin tətbiq olunmasının qarşısı alınacaq.
• Dövlət xidmətlərində ixtisar aparılmasına ehtiyac olmayacaq.
Bundan əlavə, tərəflər arasında Müdafiə Nazirliyinin tələb etdiyi xərclərə nəzarət edəcək xüsusi monitorinq mexanizminin yaradılması barədə də razılıq əldə olunub.