İsrail parlamenti – Knesset 7 oktyabr 2023-cü il hadisələrinin araşdırılması üçün milli istintaq komissiyasının yaradılmasını nəzərdə tutan qanun layihəsini ilk oxunuşda qəbul edib.
Hakim koalisiya bildirir ki, yeni mexanizm dövlət istintaq komissiyasına alternativ olacaq və hadisələrin daha obyektiv araşdırılmasına imkan verəcək. Qanun layihəsinə əsasən, komissiya yalnız ən azı 80 deputatın dəstəyi ilə yaradıla bilər.
Əgər belə bir konsensus əldə olunmasa, üç hakim koalisiya və üç müxalifət nümayəndəsindən ibarət ikipartiyalı komissiya formalaşdırılacaq.
Sənəd komissiyaya geniş istintaq səlahiyyətləri verir. İclasların ictimaiyyət üçün açıq keçirilməsi və canlı yayımlanması, həmçinin həlak olanların ailə üzvlərinin müşahidəçi qismində prosesdə iştirak etməsi də nəzərdə tutulur.
Qanun layihəsinin ilk oxunuşdan keçməsi onun qanunvericilik prosesində qüvvədə qalmasını təmin edir. Bu isə o deməkdir ki, Knesset vaxtından əvvəl buraxılsa belə, sənəd növbəti parlament çağırışı tərəfindən müzakirəyə çıxarıla biləcək.