İspaniyada meşə yanğınlarının baş verməsində əli olmaqda şübhəli bilinən üç nəfər saxlanılıb. Yerli KİV-in məlumatına görə, hüquq-mühafizə orqanları ölkənin müxtəlif bölgələrində baş vermiş yanğınlarla bağlı bütün halları araşdırır.
Saxlanılanlardan ikisi Toledo əyalətinin Almoroks bələdiyyəsində yerləşən meşə massivində müəyyən edilib. İstintaqın məlumatına əsasən, onlar hadisə günü qaynaq işləri aparıb və bucaq daşlama maşınından istifadə ediblər. Həmin vaxt bölgədə meşə yanğınları riskinin son dərəcə yüksək olması səbəbindən bu cür işlərin görülməsi qanunla qadağan edilmişdi.
Digər şübhəli isə Barselona əyalətinin Anoya bölgəsində baş vermiş irimiqyaslı meşə yanğını ilə bağlı saxlanılıb. Kataloniya Ali Məhkəməsi 58 yaşlı kişinin girov müqabilində azadlığa buraxılma hüququ olmadan həbsinə qərar verib. O, geniş əraziyə ziyan vuran yanğını törətməkdə ittiham olunur.
İstintaqın məlumatına görə, Anoya bölgəsində yanğın iyulun 6-da, ölkədə ikinci yay istiləri dalğasının yaşandığı günlərdə baş verib. Alov 450 hektardan çox meşə və kənd təsərrüfatı sahəsini məhv edib, yaşayış evlərinə və müəssisələrə ciddi ziyan vurub.
Yanğının sürətlə yayılması səbəbindən Mülki Müdafiə Xidməti növbəti gün səhərədək bölgədə təcrid rejimi tətbiq edib. Təhlükəsizlik tədbirləri çərçivəsində bir neçə bələdiyyədə yaşayan təxminən 33 min nəfər evlərini tərk edə bilməyib.
Hazırda hüquq-mühafizə orqanları saxlanılan şəxslərin meşə yanğınlarının yaranmasındakı rolunu araşdırır.
