Yenilənib: Sentyabr 8, 2026 10:54 səhər
Avropada və dünyanın müxtəlif yerlərində bir çox yəhudi icmasının antisemitizmin qaranlıq dalğası ilə üzləşdiyi bir dövrdə Azərbaycanda bir sağlam düşüncə adası mövcuddur.
Jnews.az xəbər verir ki, bu fikirləri İsrailin KAN televiziyasında Yaakov Qrudkanın aparıcısı olduğu “Mərkəzi buraxılış” proqramına xüsusi müsahibəsində Bakı Sefarad Yəhudiləri Dini İcmasının rəhbəri, ravvin Zamir İsayev bildirib. O, yaşadığı ölkədə yəhudi həyatının çiçəklənməsindən və qarşıdan gələn payız bayramlarına hazırlıqdan danışıb.
“Elul ayının selihotlarına başlamışıq və diasporadakı bütün icmalar kimi biz də Roş-Ha-Şana bayramına hazırlaşırıq”, – Zamir İsayev bildirib.
Onun sözlərinə görə, yalnız ötən ilin iyul ayında 17 mindən çox israilli turist Bakıya gəlib və ehtimallara görə, avqust ayında bu rəqəm 20 mini keçib.
Hazırda payız bayramları ərəfəsində yerli icma böyük izdihamı qəbul etməyə hazırlaşır.
“Bayramlarda və dualarda çoxlu insanın iştirak edəcəyini gözləyirik”, – ravvin qeyd edib.
Zamir İsayev əlavə edib ki, yalnız Bakı şəhərində üç sinaqoq fəaliyyət göstərir və onların yerli icmanın yəhudiləri, eləcə də ərazidə olan çoxsaylı israillilərlə dolacağı gözlənilir.
Azərbaycan: “Sıfır antisemitizm”
Müsahibənin ən maraqlı məqamı şəxsi təhlükəsizlik hissi ilə bağlı olub. Zamir İsayev qeyd edib ki, bir çox ölkələrdən fərqli olaraq, yəhudi və israilli turistlər Azərbaycanda özlərini heç bir təhlükə içində hiss etmirlər.
“Biz burada heç bir təhlükə hiss etmirik, xüsusilə də yerli yəhudi icması. Bakıya gələn və gözəl şəhərimizdən zövq alan turistlər çöldə sərbəst şəkildə ivrit dilində danışırlar. Azərbaycan ilk növbədə ona görə təhlükəsizdir ki, antisemitizm yoxdur”, – ravvin Zamir İsayev vurğulayıb.
Onun sözlərinə görə, Avropanın inkişaf etmiş ölkələrində israilli turistlər hazırda kimliklərini gizlətməyə məcbur olurlar, Azərbaycanda isə reallıq tamamilə əksinədir.
Diplomatik missiya
Zamir İsayev qeyd edib ki, ölkə müstəqil xarici siyasət yürüdür və digər ölkələrin təzyiqlərindən azaddır. Bununla yanaşı, Azərbaycan bütün dost və qardaş ölkələrlə güclü strateji ittifaqı qoruyur. Hətta bəzi ölkələr arasında münasibətlərin yaxşılaşdırılması üçün körpü rolunu oynamağa çalışır.
O, Yerusəlimdə İsrail Xarici İşlər Nazirliyinin təşkil etdiyi xüsusi qlobal forumda (G50) iştirak edib. Forumda dünyanın müxtəlif yerlərindəki yəhudi icmalarının rəhbərləri bir araya gələrək hazırda yəhudi xalqının qarşılaşdığı ümumi problemləri müzakirə ediblər.
