Yenilənib: Avqust 13, 2026 1:47 axşam
Beynəlxalq yəhudi tələbə qardaşlığı “Alpha Epsilon Pi” (AEPi) ABŞ-ın Arizona ştatının Finiks şəhərində 113-cü beynəlxalq konvensiyasını keçirib.
Dörd gün davam edən tədbirdə 500-dən çox tələbə və məzun iştirak edib. Konvensiya çərçivəsində liderlik bacarıqlarının inkişaf etdirilməsi, yəhudi icmasının qarşılaşdığı məsələlərin müzakirəsi, təşkilatın fəaliyyəti ilə bağlı məsələlərin nəzərdən keçirilməsi və qardaşlıq daxilində əlaqələrin möhkəmləndirilməsi istiqamətində tədbirlər keçirilib.
Konvensiya zamanı AEPi-nin 78-ci Ali Magistrinin, yəni beynəlxalq prezidentinin vəzifəyə rəsmi başlama mərasimi keçirilib. Bu vəzifəyə Corciya ştatının Savanna şəhərində yaşayan idarəetmə məsləhətçisi Adam Koen seçilib. A. Koen bundan əvvəl təşkilatda müxtəlif könüllü vəzifələrdə fəaliyyət göstərib və təhsil liderliyi üzrə məsləhətçi kimi çalışıb.
Şənbə günü keçirilən təntənəli ziyafətdə Skottsdeyldən olan daşınmaz əmlak mütəxəssisi və AEPi-nin keçmiş Ali Magistri Qeri Şapiro təşkilata uzun illər ərzində göstərdiyi xidmətlərə görə qardaşlığın ən yüksək mükafatı olan Şir Ordeni ilə təltif olunub.
Cümə günü keçirilən Şabbat şam yeməyi zamanı isə “B’nai B’rith International” təşkilatının keçmiş rəhbəri Daniel Mariaşin məzun kimi əldə etdiyi yüksək nailiyyətlərə görə Artur və Simi Teyç mükafatı ilə təltif edilib. Mariaşin bu yaxınlarda “B’nai B’rith International”ın baş icraçı direktoru vəzifəsində 27 illik fəaliyyətini başa vurub. O, bu müddət ərzində təşkilatın beynəlxalq vəkillik və diplomatik fəaliyyət istiqamətinə rəhbərlik edib.
Konvensiyanın əsas spikeri Cared Fayrstoun olub. 2026-cı il Milan-Kortina Qış Olimpiya Oyunlarında skeleton üzrə İsraili təmsil edən Fayrstoun yarışların açılış mərasimində İsrail bayrağını daşıyıb. Tuleyn Universitetinin məzunu olan Fayrstoun çıxış etdiyi gün AEPi qardaşlığının üzvü olub.
Tədbirdə komediyaçı, prodüser və aktivist Zak Seyc Foks, həmçinin Spin Master şirkətinin həmtəsisçisi, “Patrul balaları” uşaq cizgi serialının yaradıcılarından biri, kanadalı sahibkar və xeyriyyəçi Ronnen Harari də iştirak edib.
Konvensiyada tələbələrin psixi və emosional sağlamlığı məsələlərinə də xüsusi diqqət yetirilib. İştirakçılar qarşısında “Manny’s Band Foundation” təşkilatının təsisçisi Ben Parqman çıxış edib. Parqman çıxışında tələbələrin psixoloji rifahına daha çox diqqət yetirilməsinin vacibliyini vurğulayıb.
Konvensiyanın proqramında universitet şəhərciklərində yəhudi kimliyinin ifadə olunması, İsrailə dəstək, “tikkun olam” – dünyanın yaxşılaşdırılması prinsipi və yerli bölmələrin fəaliyyətinin təkmilləşdirilməsi kimi mövzular müzakirə olunub.
AEPi-nin baş icraçı direktoru Rob Derdiger bildirib ki, konvensiyada səsləndirilən çıxışlar və təqdim olunan mükafatlar təşkilatın yəhudi liderlərinin yetişdirilməsinə, nəsillərarası əlaqələrin möhkəmləndirilməsinə və tələbələrin öz icmalarında məsuliyyətli liderliyə hazırlanmasına sadiqliyini nümayiş etdirib.
