“The Telegraph” nəşrinin məlumatına görə, ABŞ və İsrail İrana qarşı iqtisadi təzyiqi daha da artırmaq məqsədilə quru blokadasının tətbiqi imkanını müzakirə edir. Bu məsələ çərşənbə axşamı Ağ evdə Donald Tramp və Benyamin Netanyahu arasında keçirilən görüşdə diqqət mərkəzində olub.
Məqsəd son aylarda həyata keçirilən hərbi zərbələrin və uzunmüddətli təzyiq kampaniyasının gözlənilən nəticəni verməməsindən sonra Tehrana qarşı yeni təsir mexanizmlərinin tətbiq edilməsidir.
Planın detalları və iqtisadi təcrid
Planın həyata keçirilməsi üçün Vaşinqton və Təl-Əviv İranla həmsərhəd ölkələri sərhəd-keçid məntəqələrini bağlamağa və ya onların fəaliyyətini ciddi şəkildə məhdudlaşdırmağa razı salmağa çalışacaq. Nəşrə danışan yüksək vəzifəli israilli rəsmi bildirib ki, ssenarilərdən biri İranın quru yolları ilə ticarətinin tamamilə dayandırılmasıdır.
“Təsəvvür edin ki, İran nə ölkəyə hər hansı yük gətirə, nə də ölkədən hər hansı məhsul çıxara bilir. O zaman nə baş verər?” – deyə rəsmi bildirib.
ABŞ ordusunun istefada olan general-leytenantı Şon Makfarland isə bildirib ki, belə bir blokadanın tətbiqi son dərəcə çətin olsa da, bu addım İran iqtisadiyyatına ciddi zərbə vura bilər. Onun sözlərinə görə, İranın ticarət imkanlarının məhdudlaşdırılması ölkənin iqtisadi baxımdan təcrid olunmasına gətirib çıxaracaq.
Çinlə 70 milyon dollarlıq müqavilə
Quru sərhədlərinin və əsas nəqliyyat marşrutlarının bağlanması həm də İranın yeni hərbi texnika əldə etməsini çətinləşdirmək məqsədi daşıyır. Məlumata görə, Tehran Çinlə imzaladığı 70 milyon ABŞ dolları dəyərindəki yeni razılaşma çərçivəsində yüzlərlə raket buraxıcı qurğusu və daşına bilən hava hücumundan müdafiə sistemləri (MANPADS) almağa hazırlaşır.
Donald Tramp Hörmüz boğazının yenidən açılması ilə bağlı indiyədək həyata keçirilən strategiyanın artıq nəticə vermədiyini hesab edir. Bu səbəbdən Ağ ev İranı yenidən danışıqlar masasına qaytara biləcək yeni eskalasiya variantlarını, o cümlədən “maksimum təzyiq” strategiyasının növbəti mərhələsi olan quru blokadasını nəzərdən keçirir.
