Hayfa, 13 İyul – İsrailin Hayfa şəhərində dəniz suyunun çirklənməsi səbəbindən bir neçə çimərlikdə çimmək müvəqqəti olaraq qadağan edilib.
Yoxlamalar zamanı suyun keyfiyyətinin normativ tələblərə cavab vermədiyi müəyyən olunub. Mütəxəssislərin ilkin ehtimalına görə, çirklənməyə kanalizasiya sularının dənizə qarışması səbəb ola bilər.
Sözügedən qadağa Dado, Bat-Qalim, Zamir və bir sıra digər çimərliklərə şamil edilib. Hazırda müvafiq qurumlar dəniz suyundan təkrar nümunələr götürərək laborator analizlər aparırlar. Analizlərin nəticələri qənaətbəxş olacağı təqdirdə çimərliklər yenidən istifadəyə açılacaq.
Səlahiyyətli qurumlar vətəndaşlara xəbərdarlıq edərək, qadağa tətbiq olunan çimərliklərdə dənizə girməməyə çağırıblar. Bildirilib ki, çirklənmiş su ilə təmas insan sağlamlığı üçün risk yarada bilər.