Filippinin qərbində yerləşən Oksidental Mindoro vilayəti sahillərində 5,8 bal gücündə zəlzələ qeydə alınıb.
Yeraltı təkanlar yerli vaxtla saat 10:38-də baş verib. Filippin Vulkanologiya və Seysmologiya İnstitutunun (PHIVOLCS) məlumatına əsasən, zəlzələnin episentri Oksidental Mindoro vilayətinin Mamburao şəhərindən təxminən 21 kilometr cənub-qərbdə, ocağı isə 10 kilometr dərinlikdə yerləşib.
Yeraltı təkanlar ölkənin paytaxtı Manila da daxil olmaqla bir sıra bölgələrdə hiss olunub. Paytaxtdakı ofis binalarında güclü silkələnmə hiss edilib. Ehtiyat tədbiri olaraq dövlət qurumlarından birinin əməkdaşları binadan təxliyə olunublar.
PHIVOLCS-un ilkin qiymətləndirməsinə əsasən, zəlzələ nəticəsində ciddi dağıntı və ya insan tələfatı gözlənilmir. Bununla belə, qurum bölgədə afterşokların baş verə biləcəyi barədə xəbərdarlıq edib.
Filippin “Sakit okean Alov halqası” adlanan yüksək seysmik aktivlik zonasının üzərində yerləşdiyi üçün ölkədə mütəmadi olaraq zəlzələlər və vulkan püskürmələri qeydə alınır.
Mənbə: “Reuters”