Banqkok, 13 İyul – Taylandın paytaxtı Banqkokda yerləşən restoranda baş verən güclü yanğın çoxsaylı insan itkisinə səbəb olub.
Son məlumatlara görə, hadisə nəticəsində azı 27 nəfər həyatını itirib, 60-dan çox şəxs isə yaralanıb. Bəzi mənbələr ölənlərin sayının 30 nəfərə çatdığını bildirir.
Məlumata əsasən, yanğın gecə saatlarında başlayıb və qısa müddətdə binanın böyük hissəsini əhatə edib. Hadisə yerinə çoxsaylı yanğınsöndürmə briqadaları, təcili tibbi yardım əməkdaşları və xilasedicilər cəlb olunub. Yaralılar yaxınlıqdakı xəstəxanalara çatdırılıb.
Şahidlərin sözlərinə görə, alov sürətlə yayıldığından binada olan insanların bir hissəsi çıxışa çatmaqda çətinlik çəkib. Xilasetmə qrupları uzun müddət ərzində binada axtarış apararaq zərərçəkənləri təxliyə edib.
Tayland rəsmiləri hadisə ilə bağlı araşdırmalara başlayıblar. Yanğının başvermə səbəbi hələlik rəsmi şəkildə açıqlanmasa da, ilkin ehtimal kimi elektrik sistemində yaranan nasazlıq da göstərilir.
Hadisə ölkədə son illərin ən ağır yanğın faciələrindən biri kimi qiymətləndirilir. Rəsmi qurumlar ölən və yaralananların sayının dəyişə biləcəyini bildiriblər.
