İsrail ABŞ-ın İrana qarşı mümkün yeni hərbi əməliyyatlarına qoşulmağa hazırdır. Lakin bu istiqamətdə yekun qərarın ABŞ Prezidenti Donald Trampın mövqeyindən asılı olduğu bildirilir.
Bu barədə İsrailin “Kan” televiziyası və ABŞ-ın “The New York Post” nəşri məlumat yayıb.
Məlumata görə, İsrail rəhbərliyində İrana qarşı hərbi əməliyyatların bərpasını dəstəkləyən qüvvələr var. Bununla belə, rəsmi Təl-Əviv Vaşinqtonun siyasi dəstəyini və razılığını gözləyir. Mənbələrin sözlərinə görə, İsraildə ABŞ və İran arasında qarşılıqlı hərbi zərbələrin yaxın günlərdə yenidən intensivləşə biləcəyi ehtimalı da nəzərdən keçirilir.
“The New York Post” qəzetinin Yerusəlimdəki mənbəyə istinadən yaydığı məlumata əsasən, İsrail gələcək hərbi əməliyyatlarda iştirak etməkdə və İrana qarşı müharibənin yenidən başlanmasında maraqlıdır.
“Əgər buna ehtiyac yaranarsa, biz bunu yenidən etməyə hazırıq”, – deyə nəşrin həmsöhbəti bildirib.
Mənbə qeyd edib ki, İsrail hakimiyyəti ölkə vətəndaşlarının yenidən mütəmadi olaraq sığınacaqlara enməsini istəmir. Bununla belə, Təl-Əviv hesab edir ki, İranda baş verən hadisələr fonunda kənarda qalmaq mümkün deyil.