“Baku Media Center” tərəfindən ərsəyə gətirilən “Tağıyev” bioqrafik filmi Azərbaycanda 200 mindən çox tamaşaçı toplayaraq yerli kassa tarixində ən çox baxılan milli film olub.
Epopeyanın dörd hissəsi
Silsilə dörd filmdən ibarətdir: “Tağıyev: Neft”, “Tağıyev: Çar”, “Tağıyev: Sona” və “Tağıyev: Məktəb”. Birinci hissə 2024-cü ildə, Hacı Zeynalabdin Tağıyevin vəfatının 100 illiyinə həsr olunaraq təqdim edilib. Yekun hissə olan “Tağıyev: Məktəb” filminin premyerası isə 2026-cı ildə baş tutub və ilk müsəlman qızlar məktəbinin açılışının 125 illiyinə həsr edilib.
Milli Kino Günü ilə əlaqədar “CinemaPlus” kinoteatrlar şəbəkəsi “Tağıyev filmləri həftəsi” keçirir. Bu çərçivədə hər dörd hissənin nümayişi avqustun 9-dək davam edəcək.
Genişmiqyaslı istehsal
Layihə Azərbaycan kino tarixində ən böyüklərdən biri olub. Çəkilişlər 76 məkanda aparılıb, 300-dən çox xüsusi dekorasiya qurulub, kütləvi səhnələrdə isə 2500-ə yaxın insan iştirak edib. Ekran əsərinin icraçı prodüseri Arzu Əliyeva, rejissoru isə Zaur Qasımlı olub.
Tağıyev rolunu “Dədə Qorqud” kino festivalında ən yaxşı kişi rolu mükafatını alan Azərbaycanın Xalq artisti Pərviz Məmmədrzayev canlandırıb.
Beynəlxalq etiraf
Epopeyanın birinci hissəsi (“Tağıyev: Neft”) 98-ci “Oskar” mükafatının “Ən yaxşı xarici bədii film” nominasiyasında Azərbaycandan irəli sürülüb. Ekran əsəri həmçinin ən yaxşı rəng korreksiyasına görə Dehancer Colourist Awards 2024 mükafatına layiq görülüb.
2026-cı ildə film Londonda, Britaniya Kino və Televiziya Sənətləri Akademiyasının (BAFTA) Şahzadə Anna zalında təqdim olunub, bundan əvvəl isə xüsusi nümayişlər Los-Ancelesdə keçirilib.
Mənbə: report.az