Azərbaycanda Milli Məlumat Hövzəsi təsis edilib. Bu barədə rəqəmsal inkişaf və nəqliyyat naziri Rəşad Nəbiyev iyunun 29-da məlumat verib.
Nazir bu açıqlamanı Birinci vitse-prezident Mehriban Əliyevanın sədrliyi ilə keçirilən Rəqəmsal İnkişaf Şurasının ilk iclasında səsləndirib. Onun sözlərinə görə, hazırda dövlət informasiya sistemlərinin hökumət buluduna köçürülməsi və yeni data mərkəzinin tikintisi istiqamətində işlər aparılır.
Rəşad Nəbiyev "mygov" platformasının xidmət dairəsinin genişləndirildiyini də qeyd edib. O bildirib ki, son üç ay ərzində istifadəçilərin sayı 2,7 milyondan 3,5 milyona çatıb. Artıq bir neçə tətbiq platformaya inteqrasiya olunub.
Nazir ilin sonuna qədər daha yeddi dövlət tətbiqi üzrə xidmətlərin vətəndaşların istifadəsinə veriləcəyini də əlavə edib. Fəaliyyət planının əsas prioritetlərindən birinin süni intellekt olduğunu vurğulayan Nəbiyev, "mygov" və digər dövlət qurumlarında müvafiq həllərin tətbiqinin artırıldığını və virtual vətəndaş köməkçisinin istifadəyə verildiyini söyləyib.