Çin ABŞ və Tayvanla mümkün silahlı qarşıdurmaya hazırlıq çərçivəsində ABŞ-ın hərbi bazalarının, döyüş gəmilərinin və Tayvanın strateji dövlət obyektlərinin tam ölçülü maketlərini inşa edərək onların üzərində raket zərbələri və hücum ssenarilərini məşq edir.
“The Telegraph” qəzetinin peyk görüntülərinin təhlilinə əsaslanan məlumatına görə, Çin Xalq Azadlıq Ordusunun (ÇXAO) poliqonlarında ABŞ-ın Yaponiyadakı Yokosuka hərbi-dəniz bazasının, Tayvanın Suao hərbi bazasının və ABŞ Hərbi Dəniz Qüvvələrinə məxsus esmineslərin maketləri yaradılıb.
Peyk görüntülərində həmin obyektlərdə raket zərbələrinin izləri aydın görünür. Bu isə Çin ordusunun real silah sınaqları keçirdiyini və mümkün döyüş əməliyyatlarının müxtəlif ssenarilərini məşq etdiyini göstərir.
Hərbi ekspertlərin qiymətləndirməsinə görə, bu təlimlər zamanı Çin gəmi əleyhinə, ballistik və hipersəsli raketlərin, o cümlədən YJ-21 və YJ-17 raket komplekslərinin tətbiqini sınaqdan keçirir.
Məlumata görə, Pekin Tayvana yönəlmiş hazırlığa da xüsusi önəm verir. Çin hərbçiləri Taybeydə yerləşən hökumət binalarının, prezident iqamətgahının və paytaxt küçələrinin dəqiq maketlərini hazırlayıblar. Ekspertlərin fikrincə, bu obyektlər Tayvan rəhbərliyinin əsas idarəetmə mərkəzlərinin ələ keçirilməsi və paytaxta hücum ssenarilərinin məşq edilməsi məqsədilə istifadə olunur.
Analitiklər hesab edirlər ki, bu hazırlığın miqyası indiyədək görünməmiş səviyyədədir. Onların sözlərinə görə, maketlər təkcə hərbi təlim vasitəsi deyil, həm də geosiyasi mesaj xarakteri daşıyır. Pekin bununla Tayvana adanın güc yolu ilə ələ keçirilməsinə hazır olduğunu nümayiş etdirir, ABŞ-a regiondakı hərbi bazalarının potensial hədəf ola biləcəyini göstərir, Yaponiyaya isə mümkün münaqişəyə cəlb olunma riskini xatırladır.