İyulun 23-də Rusiyanın xarici işlər naziri Sergey Lavrov Filippinin paytaxtı Manilada keçirilən ASEAN Xarici İşlər Nazirlərinin Toplantısı çərçivəsində ABŞ dövlət katibi Marko Rubio ilə görüşüb.
Görüş zamanı tərəflər Rusiya-ABŞ münasibətləri, Ukraynadakı müharibə, eləcə də regional və beynəlxalq gündəmdə yer alan məsələlər ətrafında geniş fikir mübadiləsi aparıblar.
Rusiya Xarici İşlər Nazirliyinin məlumatına görə, Sergey Lavrov ABŞ tərəfinə təmas xəttindəki vəziyyət barədə məlumat verib və Moskvanın Ukrayna münaqişəsinin siyasi və diplomatik yollarla həllinə hazır olduğunu bildirib. O, həmçinin Rusiya Prezidenti Vladimir Putin ilə ABŞ Prezidenti Donald Tramp arasında keçirilməsi planlaşdırılan görüşlə bağlı Vaşinqtonun irəli sürdüyü təkliflərə Rusiyanın sadiq qaldığını vurğulayıb.
Tərəflər Fars körfəzindəki vəziyyəti, Rusiya və ABŞ-ın diplomatik nümayəndəliklərinin fəaliyyətinin normallaşdırılması məsələsini, eləcə də kosmik sahədə əməkdaşlığı da müzakirə ediblər.
Rusiya XİN-in məlumatında qeyd olunub ki, nazirlər parlamentlərarası və mədəni əlaqələrin inkişaf etdirilməsinin vacibliyini vurğulayıb, həmçinin xarici işlər nazirlikləri arasında təmasların davam etdirilməsi barədə razılığa gəliblər.
ABŞ Dövlət Departamenti və beynəlxalq xəbər agentliklərinin yaydığı məlumata görə, görüşün əsas mövzusu Ukraynadakı müharibə və iki ölkə arasında dialoqun davam etdirilməsi olub. ABŞ dövlət katibi Marko Rubio Vaşinqtonun Moskva ilə təmasları davam etdirmək niyyətində olduğunu bildirib.