Yenilənib: Sentyabr 8, 2026 3:39 axşam
Bakı Olimpiya Stadionunda (BOS) futbol meydançasının bərpası ilə bağlı intensiv işlərə başlanılıb. İşlər “Sabah” futbol klubunun UEFA Çempionlar Liqasının liqa mərhələsində ev oyunlarına hazırlıq çərçivəsində həyata keçirilir.
Jnews.az xəbər verir ki, hazırda mütəxəssislər meydançanın üst örtüyünün əvvəlki qatını söküblər. Səthin hamarlanması üçün əraziyə qum qatı çəkilir. Stadion üçün yeni təbii ot örtüyü rulonlarının da artıq sifariş edildiyi bildirilir.
İş qrafikinə əsasən, meydança oktyabrın 5-dən gec olmayaraq tam istifadəyə hazır olmalıdır. İşlərin daha sürətli aparılması halında bərpanın sentyabrın sonunadək başa çatdırılması gözlənilir.
“Sabah” UEFA Çempionlar Liqasının liqa mərhələsində ilk oyununu sentyabrın 10-da səfərdə İngiltərənin “Mançester Yunayted” klubuna qarşı keçirəcək. Azərbaycan çempionu turnirdə ilk ev oyununu isə oktyabrın 13-də Çexiyanın “Slaviya” (Praqa) klubuna qarşı Bakı Olimpiya Stadionunda keçirəcək.
